नक्कली हावाले
किन पठाईरहेको छ
आँधी आउने हल्ला
र बगाईरहेको छ तातो हावा ।
कस्तै गर्मीमा पनि
छालाले स्पर्ष गर्दैन
चिसो बतासको स्वाद
नाकका पोराहरूमा
कुनै सुगन्ध आउदैन माटोको
यो तातो हावामा मच्छरहरू हराउन जरुरी थिएन
हराएन पनि ,
बच्चाहरुको शरिरमा घमौरा हराउन जरुरी थिएन
हराएन पनि ,
खेतबारीमा काम गरिरहेका मानिसहरुको
पसिना ओवाउन जरुरी थिएन
ओवाएन पनि,
कसले कहाँ बाट र किन पठाइरहेछ
यो नक्कली तातो हावा
हिजो आज सबै चौतारोहरुमा
चिया पसलहरुमा
निधार खुम्च्याएर
यही कुरा सोचीरहेका छन् मानिसहरू ।
हावा त् आखिर सल्लाघारी छिचोलेरै आएको थियो
ठुलठुला अक्करहरु नाघेरै आएको थियो
हिमालका चिसा भन्ज्यांगहरु छिचोलेरै आएको थियो
उ आउने सूचना
ठुलै हल्ला बनेर आएकै थियो।
हल्ला त्,
गाउँ हुँदै सहर गएकै हो
जसको केही उड्नु थिएन / उडाउनु पनि थिएन
तिनीहरु स्वागत गर्न बसेकै हुन्
हुण्डरीले जसका केही टपरा/ दुनाहरु उडाउदै थियो
तिनीहरु बिरोधमा बसेकै हुन्
आँधी / हुण्डरीले केही नउडाए पछि
बिरोधमा बसेकाहरु
सारै खुसीछन् यतिबेला,
आँधी / हुण्डरीले केही नउडाए पछि
स्वागतमा बसेकाहरु
सारै दुखीछन् यतिबेला,
नक्कली हावाले
किन पठाईरहेको छ
आँधी आउने हल्ला
र बगाईरहेको छ तातो हावा ।
No comments:
Post a Comment